BIANTARA

DINA UPACARA MILANGKALA CIANJUR KA 345 TAUN 2022

SALASA, 12 JULI 2022   TABUH 07.30 WIB

ASSALAAMU’ALAIKUM  WR. WB.

SAMPURASUN NUUN.....

• NU KU SIM KURING DIPIHORMAT, PUPUHU, PARA WAWAKIL PUPUHU MIWAH PARA ANGGOTA DPRD KABUPATEN CIANJUR

• NU KU SIM KURING DIPIHORMAT, FORUM KOMUNIKASI PIMPINAN DAERAH

• NU KU SIM KURING DIPIHORMAT, PARA PAJABAT SIPIL, TNI, POLRI, PARA SESEPUH, ALIM ULAMA RAWUH PARA INOHONG MASYARAKAT,

• HADIRIN HADIROT NU SAMI LINGGIH HORMATEUN SIM KURING

PANUHUN LULUHUNG KALBU, PANEDA KAJEMBARAN MANAH. KALAYAN PAMUJI NU SAJATI, JANTEN PANGHIAS ATI NU NGANCIK DINA SANUBARI, URANG SAMI MUNAJAT KA NU MAHA SUCI ROBBUL IZATI, ALLOH AZAA WAJALLA, NU PARANTOS MASIHAN RUPI RUPI KANI'MATAN KA URANG SADAYA. UTAMINA NI'MAT IMAN, NI’MAT ISLAM SARENG NI'MAT KASEHATAN TUR KASALAMETAN.

KIWARI URANG SADAYA TIASA RIUNG MUNGPULUNG DEUI PAAMPROK JONGHOK, HEMPAK  MURBAYAKSA  DINA RARAGA MILANGKALA CIANJUR ANU KA 345 TAUN 2022.

OGE SOLAWAT SARENG SALAM, MUGIA SALAWASNA DIPANTENGKEUN KA JUNGJUNAN URANG PAMINGPIN UMMAH SAPANJANG JAMAN, HABIIBANA WAMAULANA MUHAMMAD SAW NU PARANTOS MAPARIN CAHYA KAIMANAN KITU DEUI KA PARA KULAWARGINA. SADAYA SOHABAT SARENG UMMAHNA NU TOAT TUG DUGI KA YAUMUL AHIR

HADIRIN HORMATEUN SIM KURING,

SAKUMAHA NU KAUNINGA, REHNA MILANGKALA HIJI WEWENGKON MIBANDA HARTOS URANG PERELU NYOREANG ALAM KA TUKANG PIKEUN NEULEUMAN DEUI KUMAHA KASANG TUKANG SAJARAHNA, OGE NEULEUMAN LANGKUNG TELEB RENGKAH LULUHUR KARUHUN CIANJUR DINA BABAKTI NGAWANGUN TATAR CIANJUR SADAYA YASA LULUHUR CIANJUR TEH KEDAH DIJANTENKEUN EUNTEUNG KANGGO MECUT SUMANGET URANG KIWARI, DINA NGARONJATKEUN PANGWANGUNAN NU LANGKUNG TELEB.

CIANJUR KIWARI, NU AJEG DINA PAPAGON NU TOS NATRAT DITUTURUSAN KU PITUTUR SEPUH. NGADEGNA CIANJUR KIWARI, TANGTOS SANES UKUR DINA REKA CATUR WUNGKUL, TAPI DINA NGEUSI HIRUP HURIPNA KEDAH DIBARUNG KU PATEKADAN, UCAP JEUNG LAMPAH NU LUYU SARENG AJARAN AL QUR'AN DIWUWUH HADITS. MALAR UDAGAN PARA SEPUH URANG KAPUNGKUR TIASA LANGKUNG RAHARJA. HAYU URANG HONTAL CIANJUR MANJUR TUR MIBANDA AHLAK MULYA.

PARA WARGI ANU DIMULYAKEUN,

SAKUMAHA NU TOS DILUMAKUKEUN KU PANATA CALAGARA, TEMA MILANGKALA CIANJUR TAUN IEU NYAETA NGAHONTAL: "CIANJUR RAHAYU, RAHARJA, DIGJAYA". MAKSADNA MALAR URANG SADAYA MIBANDA SUMANGET NU NGAGEDUR BARI DIBARUNG PATEKADAN PIKEUN NGAWUJUDKEUN CIANJUR NU SUGIH MUKTI LOH JINAWI. TATA TINGTRIM AYEM, RAHARJA TUR DIGJAYA BARI KAKONCARA KA JANAPRIA SALUYU SARENG VISI CIANJUR KIWARI NU MANJUR, MANDIRI, MAJU, RELIGIUS TUR MIBANDA AHLAK MULYA.

SIM KURING OGE NGAHATURKEUN NUHUN KA PANATA CALAGARA NU PARANTOS NGAHANCENGKEUN RUPI RUPI KAGIATAN DINA NGAREUAH REUAH MILANGKALA CIANJUR TAUN IEU. KANTENAN BARI SEUEUR NGALIBETKEUN MASARAKAT SAGEMBLENGNA. MASARAKAT CIANJUR KEDAH NGIRING ANCRUB, NGIRING GULIGAH, BARI NGARAOSKEUN RAMENA MILANGKALA WEWENGKONNA. HAL IEU PERYOGI DITERASKEUN, MALAR SADAYA WARGA CIANJUR NGARAOS REUEUS TUR NYAAH KA TANAH SARAKANANA, BARI TETEP HANGKEUT NGAJAGI, NGARAKSA SARENG NGAMUMULE BUDAYANA NU KACIDA LINUHUNGNA,

KANTENAN UPAMI NINGGAL SALAMI DUA TAUN KAPENGKER IEU, URANG SADAYA TOS DIPAPARIN COCOBI KU NEREKABNA PANYAKIT COVID 19. KU PITULUNG ALLOH SWT. IEU PANYAKIT KIWARI NGAWITAN LUNGSUR. HAL IEU, TINANGTOS TINA ALPUKAH SASARENGAN DINA NGADALIKEUNNANA. NAMUNG  SIM KURING MEREDIH, SANAOS IEU COVID TERAS LUNGSUR, ANGGER KEDAH WASPAOS,  KU NGAJAGI KASEHATAN. MARGI TACAN ILANG SIRNA SAGEMBLENGNA.

PARA WARGI NU DIPIHORMAT,

DINA WAKTOS NU KACIDA SAENA IEU, SIM KURING NEDA WIDI BARIS NGADUGIKEUN KABUNGAH. WIREH CIANJUR TOS NAMPI SABABARAHA PANGLELER TI PAMARENTAH PUSEUR SARENG PROVINSI JAWA BARAT. TI AWIT SASIH MEI 2001 DUGI KA MEI 2022, KACUTAT CIANJUR NAMPI 34 RUPI PANGLELER.

KUKITUNA SIMKURING NGAHATURKEUN TIMPAH SEWU NUHUN KASADAYA PIHAK TI KAWIT LEGISLATIF, APARATUR PAMARENTAH DAERAH, TNI, KEPOLISIAN SARENG KA SAKUMNA MASARAKAT, ANU PARANTOS NGAROJONG SAGALA RUPI PROGRAM.

BUKTOS ANU SANESNA TINA RAMPAK GAWE URANG DINA SABABARAHA DINTEN KAPENGKER, KABUPATEN CIANJUR KENGING DEUI KASINUGRAHAAN MANGRUPI “PANGLELER WTP (WAJAR TANPA PENGECUALIAN)” TI BADAN PEMERIKSA KEUANGAN REPUBLIK INDONESIA, MINANGKA PANGAJEN DINA NGOKOLAKEUN APBD KABUPATEN CIANJUR TAUN 2021.

NAMUNG SIMKURING TETEP MIHAREP SAGALA PANCEN KATUT RAMPAK  GAWE URANG KAPAYUNA DINA NGAHUCUHKEUN SANESKANTEN GARAPAN, PIKEUN NGAHONTAL KARAHARJAAN MASARAKAT CIANJUR.

PARA WARGI NU DIPIHORMAT,

SATEUACAN MUNGKAS IEU BIANTARA, SIM KURING SEJA NGAHATURKEUN WILUJENG MILANGKALA CIANJUR NU KA 345 TAUN 2022. SAKANTENAN NGAWILUJENGKEUN MILANGKALA "HARI KOPERASI" NU KA 75 TAUN 2022,  ANU KALERESAN WAKTOSNA SAMI. MUGIA TRANSFORMASI KOPERASI UNTUK EKONOMI BERKELANJUTAN MANGKIN JAYA – MANGKIN MAJU SALUYU SARENG KAMAJUAN ZAMAN TUR ANGGOTANA LANGKUNG RAHARJA.

SAKITU NU KAPIHATUR, LUHUR SAUR BAHE CAREK, BOBOT SAPANON CARANG SAPAKAN, NEDA JEMBAR PANGAPUNTEN, KALAWAN MUGIA ALLOH SWT SALAWASNA MAPARIN PITUDUH SARENG NANGTAYUNGAN KA URANG BALAREA.

AAMIIN YAA ROBBAL ALAMIIN.

CEUK SAHA CIANJUR TUMPUR,

NU PUGUH CIANJUR SUBUR

CEUK SAHA URANG CIANJUR JOLEDAR

NU PUGUH URANG CIANJUR MOTEKAR

BILLAHI TAUFIK WAL HIDAYAH

WASSALAMU’ALAIKUM WR. WB.